တၢ်သမံသမိးပှံာ်ပှၢ်န့ၣ် မၤစၢၤဃုထံၣ်မ့တမ့ၢ်ဒီသ
ဒၢပှံာ်ပှၢ်ခဲစၢၣ်တၢ်ဆါသ့လီၤ.

ဟံးန့ၢ်တၢ်စံးဆၢလၢ နတၢ်သံကွၢ်တဖၣ်အဂီၢ်ဘၣ်ဃး တၢ်မၤကွၢ်ပှံာ်ပှၢ်တက့ၢ်.

တၢ်မၤကွၢ်ပှံာ်ပှၢ်န့ၣ် မ့ၢ်တၢ်ဒီသဒၢအတၢ်ကွၢ်ထွဲတၢ်ကွၢ်သမံသမိးတၢ်မၤတမံၤလၢအကါဒိၣ်
ဒီးဃုထံၣ်စၢၤခဲစၢၣ်ခီၣ်ထံး မ့တမ့ၢ်ပှံာ်ပှၢ်ခဲစၢၣ်တၢ်ဆါန့ၣ်လီၤ. နဃုထံၣ်ပှံာ်ပှၢ်ခဲစၢၣ်တၢ်ဆါပနီၣ်တဖၣ်မ့ၢ်ဆိဆိန့ၣ် ညီဒိၣ်လၢကဒီသဒၢ မ့တမ့ၢ်ကူစါယါဘျါအီၤန့ၣ်လီၤ.

Blue Cross စံးဆၢဝဲ တၢ်သံကွၢ်ညီနုၢ်တဖၣ်လၢအဘၣ်ဃးတၢ်သမံသမိးပှံာ်ပှၢ်ဒီးအ့ၣ်ကျိၤန့ၣ်လီၤ. နမ့ၢ်ကြၢးဘၣ်ဒီး တၢ်ဟ့ၣ်ကူၣ်တၢ်ဒီသဒၢပှံာ်ပှၢ်ဒီးအ့ၣ်ကျိၤတၢ်ကွၢ်သမံသမိးန့ၣ် ရဲၣ်ကျဲၤလီၤနတၢ်ဟဲဆူကသံၣ်သရၣ်အိၣ်တနံၤညါအံၤတက့ၢ်.

ဃုဒိးန့ၢ်ကသံၣ်သရၣ်တဂၤ

တၢ်သမံသမိးပှံာ်ပှၢ်ဒီးအ့ၣ်ကျိၤန့ၣ်မ့ၢ်တၢ်မနုၤလဲၣ်.

တၢ်သမံသမိးပှံာ်ပှၢ်န့ၣ် မ့ၢ်ကျဲကျိၤတမံၤလၢအပျဲကသံၣ်သရၣ်ကွၢ်တၢ်လၢနပှံာ်ပှၢ်အပူၤ ခီဖျိကျိၤဘိဆံးတဘိလၢအအိၣ်ဒီးမ့ၢ်အူဒီးခဲမရၣ်လၢပှၤကိးအီၤအဲၣ်ဒိၣ်စကိးန့ၣ်လီၤ. နကသံၣ်သရၣ်မ့ၢ်ထံၣ် တၢ်ဒိၣ်ထီတမူာ်တနီၢ်တမံၤဖဲတၢ်မၤကွၢ်နၤအခါန့ၣ် အဝဲကဟံးန့ၢ်စဲ(လ)လၢနညၣ် ဒ်သိးကဘၣ်တၢ်ကွၢ်အီၤလၢ ကသံၣ်သရၣ်မၤလိတၢ်ဆါအဂ့ၢ်န့ၣ်လီၤ.

တၢ်မၤကျိၤကျဲအံၤ မၤစၢၤကသံၣ်သရၣ်ဒ်သိး ကဃုထံၣ်ပှံာ်ပှၢ်ခဲစၢၣ်တၢ်ဆါပနီၣ်ဆိတဖၣ် ဒီးထုးထီၣ်ကွံာ်တၢ်ဒိၣ်ထီၣ်တမူာ်တနီၢ်တဖၣ် ဒ်သိးကဒီသဒၢအီၤ တချုးတၢ်ကဲထီၣ်ခဲစၢၣ်စဲ(လ)တဖၣ်န့ၣ်လီၤ.

ပှံာ်ပှၢ်တၢ်ဆါန့ၣ် ကဲထီၣ်အါထဲလဲၣ်.

အမဲရကၤခဲစၢၣ်ကရၢစံးဝဲလၢ ပှံာ်ပှၢ်ဒီးအ့ၣ်ကျိၤခဲစၢၣ်တၢ်ဆါန့ၣ် မ့ၢ်ဝဲတၢ်ဆါလၢအကဲထီၣ်အါကတၢၢ်အကျါသၢမံၤတမံၤ ဒီးတၢ်ဆါသၢမံၤတမံၤလၢအဒုးအိၣ်ထီၣ်ပိာ်မုၣ်ပိာ်ခွါတဖၣ်အတၢ်သံလၢခဲစၢၣ်အဃိ လၢကီၢ်အမဲရကၤန့ၣ်လီၤ.

တၢ်ဃုထံၣ်ပှံၢ်ပှာ်ခဲစၢၣ်တၢ်ဆါ ဒီးတၢ်သံနီၣ်ဂံၢ်န့ၣ် ဟဲစှၤလီၤလၢပိာ်မုၣ်ဒီးပိာ်ခွါတဖၣ် လၢဆံဖှိၣ်နံၣ်တဖၣ်လံ မ့ၢ်လၢတၢ်ကွၢ်သမံသမိးအါထီၣ်အဃိလီၤ. အဝဲအံၤမ့ၢ်တၢ်ကစီၣ်အမုာ်န့ၣ်လီၤ.

ယကဘၣ်မၤတၢ်သမံသမိးပှံၢ်ပှာ်ဒီးအ့ၣ်ကျိၤဖဲလဲၣ်အဆၢကတီၢ်လဲၣ်.

ပိာ်ခွါဒီးပိာ်မုၣ်ခဲလၢာ်လၢအသးပှၢ်န့ၢ် 45 နံၣ်န့ၣ်ကြၢးဘၣ်တၢ်ကွၢ်သမံသမိးအီၤ အစှၤကတၢၢ် 10 နံၣ်တဘျီန့ၣ်လီၤ.

နမ့ၢ်အိၣ်ဒီးတၢ်ဘၣ်ယိၣ်တဖၣ် ဒ်သိးဟံၣ်ဖိဃီဖိအိၣ်ဒီးပှံာ်ပှၢ်ခဲစၢၣ်တၢ်ဆါတၢ်စံၣ်စိၤတဲစိၤ မ့တမ့ၢ်တၢ်အိၣ်သးလၢအမၤဆူးဆါနပှံာ်ပှၢ် (အဒိတၢ်ဒိၣ်ထီၣ်မ့တမ့ၢ်အ့ၣ်ကျိၤညိးထီၣ်တၢ်ဆါ ဒ်သိး ulcerative colitis မ့တမ့ၢ် ခရိၣ်အၢၣ်တၢ်ဆါ)န့ၣ် နကသံၣ်သရၣ်ကဃ့ထီၣ်တၢ်သမံသမိးပှံာ်ပှၢ်ဒီးအ့ၣ်ကျိၤ ဆိန့ၢ်အသး 45 နံၣ်မ့တမ့ၢ်အဘျီအါန့ၢ် 10 နံၣ်တဘျီန့ၣ်လီၤ.

ယကဘၣ်လဲၤဒိးန့ၢ်တၢ်ကွၢ်သမံသမိးဖဲလဲၣ်.

ကသံၣ်သရၣ်တဂၤန့ၣ် မၤဝဲညီနုၢ်တၢ်သမံသမိးပှံာ်ပှၢ်ဒီးအ့ၣ်ကျိၤ လၢတၢ်ဆါဟံၣ်လၢပှၤဆါတလိၣ်နုာ်ထီၣ် (တၢ်ဆါဟံၣ်လၢအအိးထီၣ်လၢမုၢ်ဆါကတီၢ်)န့ၣ်လီၤ. နသူတိၢ်စှၤလၢတၢ်ဆါဟံၣ်လၢပှၤဆါတလိၣ်နုာ်ထီၣ်ကသ့ဒ်လဲၣ်န့ၣ် မၤလိတက့ၢ်.

ဖဲယကတဲာ်ကတီၤတၢ်လၢ တၢ်သမံသမိးပှံာ်ပှၢ်ဒီးအ့ၣ်ကျိၤအခါ ယကြၢးမၤတၢ်မနုၤလဲၣ်.

နကြၢးမၤတၢ်အါမး ဖဲလၢနကတဲာ်ကတီၤတၢ်လၢ တၢ်သမံသမိးပှံာ်ပှၢ်ဒီးအ့ၣ်ကျိၤအခါန့ၣ်လီၤ. တချုးတၢ်သမံသမိး လၢ 24 နၣ်ရံၣ်အတီၢ်ပူၤန့ၣ် လိၣ်နလၢနကအီထဲအထံ, အီတၢ်ထံတမံၤလၢကသ့စီကွံာ်နပှံာ်တဖၣ် ဒီးအိၣ်ဘူးလၢနဟံၣ်ဒီးတၢ်ဟးလီၢ်န့ၣ်လီၤ.

တၢ်ကတဲာ်ကတီၤအံၤန့ၣ် အကါဒိၣ် ဒ်သိးနကသံၣ်သရၣ်န့ၣ်ကွၢ်နပှံာ်ကျိၤကသ့န့ၣ်လီၤ.

လၢတၢ်သမံသမိးပှံာ်ပှၢ်ဒီးအ့ၣ်ကျိၤန့ၣ် တၢ်မနုၤကဲထီၣ်လဲၣ်.

လၢတၢ်မၤအကျဲအကျိၤအံၤန့ၣ် နကဒိးန့ၢ်ကသံၣ်မံ ဒ်သိးကမၤဂၢၢ်နသးအဂီၢ်န့ၣ်လီၤ. တၢ်မၤအကျဲအကျိၤအပူၤန့ၣ် ကသံၣ်သရၣ်ကကွၢ်နပှံာ်လၢအဲၣ်ဒိၣ်စကိး ဒီးထုးထီၣ်ကွံာ်တၢ်ညိးထီၣ်အါထီၣ်တဖၣ်ခဲလၢာ်န့ၣ်လီၤ. နကအိၣ်ဒီးတၢ်သးသဒ့ၣ်(တမံဘၣ်သး)ဘၣ်ဆၣ် နတပာ်သူၣ်ပာ်သးတၢ်ဝဲအံၤဘၣ် ဒီးနတသ့ၣ်နီၣ်အီၤဘၣ်.

တၢ်မၤအံၤမ့ၢ်ဝံၤန့ၣ် နကပၢၢ်ထီၣ်လၢကသံၣ်မၤမံနၤလၢတၢ်ဘျါထီၣ်ဒၢးပူၤ ဒီးကသံၣ်သရၣ်န့ၣ်ကကွၢ်ကဒါက့ၤနတၢ်သမံသမိးပှံာ်ပှၢ်ဒီးအ့ၣ်ကျိၤအစၢတဖၣ် သကိးလၢနၤလီၤ. ကသံၣ်သရၣ်မ့ၢ်ထုးထီၣ်ကွံာ်တၢ်ညိးထီၣ်အါထီၣ်တဖၣ်န့ၣ် ကဒုးသ့ၣ်ညါနၤတၢ်ဆါဂ့ၢ်ကျိၤအစၢတဖၣ် လၢမုၢ်နံၤတနီၤအတီၢ်ပူၤန့ၣ်လီၤ.

မ့တမ့ၢ်တၢ်သမံသမိးပှံာ်ပှၢ်ဒီးအ့ၣ်ကျိၤန့ၣ် တၢ်လၢယမၤသ့အိၣ်အဂၤတမံၤဒံးဧါ.

တၢ်သမံသမိးပှံာ်ပှၢ်ဒီးအ့ၣ်ကျိၤန့ၣ် ဘၣ်တၢ်ဆိကမိၣ်အီၤလၢကျဲအဂ့ၤကတၢၢ်တမံၤ လၢတၢ်ခံကွၢ်စီကွၢ်ပှံာ်ပှၢ်ခဲစၢၣ်တၢ်ဆါအဂီၢ်န့ၣ်လီၤ. ဘၣ်သ့ၣ်သ့ၣ်နကနၢ်ဟူတ့ၢ်လံဘၣ်ဃးဒီးတၢ်မၤကွၢ်အဂုၤအဂၤတဖၣ်ဘၣ်ဆၣ် အဝဲသ့ၣ်န့ၣ်တဘၣ်တၢ်ဆိကမိၣ်လၢ ကျဲလိၤလိၤမ့တမ့ၢ်လၢပှဲၤထဲသိး တၢ်သမံသမိးပှံာ်ပှၢ်ဒီးအ့ၣ်ကျိၤဘၣ်:

စ့းကမွဲၣ်ဒိၣ်စကိးဖံၣ်လၢအဆီတလဲညီ: ကွၢ်တၢ်ထဲလၢပှံာ်ပှၢ်အဖီလာ်တကူာ်
တၢ်ခံကွၢ်စီကွၢ်အ့ၣ်: ကွၢ်ထဲသွံၣ်လၢအအိၣ်လၢအ့ၣ်အပူၤ
DNA ဘၣ်ဃးအ့ၣ်လီၤဂာ်တဖၣ်: ကွၢ်ထဲခဲစၢၣ်စဲ(လ)တဖၣ်လၢအဟဲပိာ်ထွဲလၢအ့ၣ်အပူၤ
CT တၢ်သမံသမိးပှံာ်ပှၢ်ဒီးအ့ၣ်ကျိၤ (ပှၤသ့ၣ်ညါအီၤစ့ၢ်ကီးဒ် တၢ်သမံသမိးပှံာ်ပှၢ်ဒီးအ့ၣ်ကျိၤခီဖျိခီၣ်ဖၠူထၢၣ်): စူးကါဝဲဒၣ် တၢ်ကပီၤဂံၢ်သဟီၣ်စှၤစှၤ ဒ်သိးကကွၢ်ပှံာ်ပှၢ်အဂီၤ, မ့ၢ်ထံၣ်မိၢ်ပှၢ်စဲ(လ)အါထီၣ်တဖၣ်န့ၣ်ထုးထီၣ်ကွၢ်အီၤတသ့

တၢ်ဒီသဒၢပှံာ်ပှၢ်ခဲစၢၣ်တၢ်ဆါအဂီၢ်ယမၤတၢ်မနုၤကသ့လဲၣ်.

တၢ်လီၤဘၣ်ယိၣ်တဖၣ်အိၣ်လၢပှံာ်ပှၢ်ခဲစၢၣ်အဂီၢ် ဒီးနမၤစှၤလီၤအီၤသ့ခီဖျိတၢ်ဃုထၢဆူၣ်ချ့ကျဲတဖၣ်ဒ်သိး:

တဘၣ်အိမီၣ်တဂ့ၤ
တြီသံးအတၢ်ပှဲၤအံၤပှဲၤနုၤလၢနအီ
အီၣ်တၢ်အီၣ်လၢအအိၣ်အါဒီးအလုၣ်အါဒီးတၢ်လၣ်အလါအါမး
ပၢၤဃာ်နီၢ်အဃၢလၢအကြၢးအဘၣ်
နမ့ၢ်အိၣ်ဒီးကဖုတၢ်ဂ့ၢ်ကီဖးဒိၣ် ဒ်သိးအသွံၣ်ထွးထီၣ်န့ၣ် ကတိၤတၢ်ဒီးကသံၣ်သရၣ်တဂၤတက့ၢ်

ယဆူၣ်ချ့တၢ်တိာ်ကျဲၤန့ၣ် ဟ့ၣ်အဘူးအလဲလၢတၢ်သမံသမိးပှံာ်ပှၢ်ဒီးအ့ၣ်ကျိၤအဂီၢ်ဧါ.

Blue Cross ဒီး Blue Plus ဆူၣ်ချ့အတၢ်တိာ်ကျဲၤတဖၣ်န့ၣ် ဟ့ၣ်အပှ့ၤလၢတၢ်ဒီသဒၢတၢ်သမံသမိးပှံာ်ပှၢ်ဒီးအ့ၣ်ကျိၤလၢ ပိာ်ခွါဒီးပိာ်မုၣ်တဖၣ်လၢအသးအိၣ် 45 နံၣ် ဒီးပှၢ်န့ၢ်အီၤ မ့တမ့ၢ်လၢပှၤတဖၣ်လၢကသံၣ်သရၣ်ပာ်ပနီၣ်အီၤဒ်တၢ်ဆါအိၣ်သ့တဖၣ်န့ၣ်လီၤ.

နမ့ၢ်စူးကါကသံၣ်သရၣ်လၢတၢ်တိာ်ကျဲၤဘျးစဲပူၤန့ၣ် တလိၣ်ဟ့ၣ်အပှ့ၤဘၣ်. မ့ၢ်လိၣ်ဘၣ်ကသံၣ်တၢ်ကွၢ်ထွဲမ့ၢ်အါထီၣ် ဒ်သိးတၢ်ထုးထီၣ်ကွၢ်စဲ(လ)အါထီၣ်န့ၣ် ဘၣ်သ့ၣ်သ့ၣ်နကဘၣ်ဟ့ၣ်အပှ့ၤလီၤ.